 |
| Sesudah perang Paderi, Datuk Machudum di Sumanik mengajarkan ilmu adat kepada Beliau Sungai Dareh. Pertengahan abad ke 19 oleh Beliau Sungai Dareh diajarkan kepada Datuk Medjo Kajo Larashoofd Batuhampar yang pertama. |
Sesudah perang Paderi, Datuk Machudum di Sumanik mengajarkan ilmu adat kepada Beliau Sungai Dareh. Pertengahan abad ke 19 oleh Beliau Sungai Dareh diajarkan kepada Datuk Medjo Kajo Larashoofd Batuhampar yang pertama. Dihampir achir abad ke 19 Datuk Madjo Kajo mengajarkan pula kepada Datuk Paduko Alam, pengarang buku "RANTJAK DI LABUAH" dan „TALIPUAK LAJUA NAN DANDAM".
Pada awal abad ke 20 Datuk Paduko Alam mengajarkan pula kepada Datuk Paduko Sati yang mengarang buku „BATJINDAI HALUIH". Dan setelah wafatnja beliau Datuk Paduko Alam, pada tahun 1920, maka tampil pulalah Datuk Paduko Sati meneruskan pelajaran itu sampai achir hayatnya pula.
Dalam tahun 1922 saya dibawa oleh ninik mamak mengikuti pelajaran itu kepada Datuak Paduko Sati bersama kawan2 yang achirnya tak berapa yang meneruskan pelajaran itu.
Dan sewafatnya Datuk Paduko Sati, maka atas tunjukan ninik mamak dalam negeri Kota nan Empat, mulai pertengahan tahun 1953 saya mulai mengajarkan pula kepada yang berminat, mula2 bertempat di Kantor Negeri Kota nan Empat dan kemudian pindah keruangan Pergruan Ma'had Islami, dan sesudah itu pindah lagi keruangan Sekolah Rakjat Balai nan Dua di Kota nan Empat.
Demikianlah sebagai pokok yang sesuai dengan HUDJAN NAN BAPUHUN, KΑΤΟ ΝΑΝ BAASA", agar hilir tampak muaranya dan mudik tentu hulunya.
Demikianlah sebagai awal kata dari saya, yang mengharapkan ampun dan ma'af kepada sidang pembaca yang mulia, jika sekiranya ada kesalahan saya yang mana manusia itu tak luput dari tersalah, walaupun siapa saja, kecuali orang yang disucikan Tuhan yang Maha Esa.
Wassalam saya,
B. DATUK NAGARI BASA.
*************************
A. Mulo Nagari Batunggu
Kato papatah caro Minang
Patitih Luhak nan tigo
Nan turun dari Perpatih nan Sabatang Manjadi kato pusako.
Nan dikatokan kato pusako
Yaitu kato undang undang
Dek banyak tak namuah lupo
Jadi pidoman pagi patang.
Didalam Luhak nan tigo
Untuak pidoman dalam hiduik
Kato kiasan didalamnyo
Tidak paham kok tak dirunuik.
Kalau dek pandang sapinteh lalu
Banyak pahamnyo tagaliciak
Pandai tak rago baguru
Salam tak sampai kakasiak.
Sadangkan baguru kapalang aja
Lai bak bungo kambang tak jadi
Kok kunun dapek dek mandang
Tidak didalam dibalusi.
Karuak kok tak sahabih gauang
Mahawai tak sahabih raso
Banyak pahamnyo nan tak lansuang Batuka dari mukasuiknyo.
Sabab karano dek baitu
Timbualah niat cinto hati
Nak marunuik tambo nan dahulu
Sajarah adat nan usali.
Hambo nan tidak cadiak pandai
Hanyo manjawek dari guru
Pituah guru dipaberai
Nan jadi paham jo alemu.
Slngajo 'guno diuraikan '
Kahadapan sidang nan basamo
Untuak nak sarno dipikiakan
Nak sarno dirunuik tujuannyo,
Manuruik warih nan dijawek, kato pusako nan ditolong, kaba asa nau dahulu, kok gunuang sabingkah tanah, bumiko sapahimbawan, kok lauik sacampak jalo, tanah darek balun lai leba, nan timbua gunuang barapi. Lorong nan niniak muyang kito, asa usuanyo kalau dikaji, di dalam tarambo lamo, sapiah balahan tigo jurai, asa nan dari Banua Ruhum.
Nan tuo Maharadjo Alif, nan tingga di banua Ruhum, nan tangah Maharadjo Depang, nan jatuah ka banua Cino, nan bongsu Maharadjo Diradjo, nan turun kapulau Ameh nangko.
Warisan niniak jo muyang, nan takarang ditarambo, nan satitiak bapantang lipua, sabarih bapantang hilang, sampai sakarang iko kini, lah babilang abad nan talampau, lah labiah saribu tahun, tak tantu musim nan talansuang, dalam pangakuan urang juo, sakato djuo tantang itu.
Manuruik Curito tambo alam, nan bongsu Maharadjo Diradjo, nan jatuah kapulau Ameh nangho, takalo maso dahulu, samusim maso saisuak, iyo bak kato pusako :
Dimano disalai palito
Dibaliak telong nan batali
Dimano turun niniak kito
Diateh gunuang barapi.
Basentak turun kebawah, dibawah labuhan si Timbago, lah tibo di Guguak Ampang, di linggundi nan baselo.
Disitulah mulo bataratak, mambuek tampat masing2, bakeh diam sorang2 sabalun bakorong jo bakampuang, sabalun bakoto banagari.
Disitulah mulo mancancang jo malatiah, jolong malambeh jo malamun, mangko batanam baro bilah. Mako ditarukolah sawah jo ladang, dilambeh hutan jo baluka, dirambah samak jo rimbo dalam, di lambang bumi tanah subur.
Jadilah sawah gadang satampang baniah, makanan urang tigo Luhak, nan dibuek niniak kito, Datuak Tantedjogarhano, niniak Kolat namo ibunyo, Indobijo namo bapaknyo, nan manurang sambia tagak, nan maatok sambia duduak.
Habih tahun babilang musim, bumi bulek alam baputa, siang jo malam dek baganti, maso baeda tak baranti, aia kian lamo makin susuik, bumi batambah laweh juo, daratan batukuak leba. Lah lapang alam bakeh diam, urang batambah kambang pulo, gunuang kian lamo makin tinggi, aka batambah manjala, budi batukuak marangkak, ditambah pulo tampat diam, diansua basentak turun. Diasah padang nan panjang, alat pakakeh dipatajam, dirateh baluka nan lah kariang, dirambah samak nan lah masiak.
Dek bana paham saukua, cinto basamo kanan elok. hilia tak rago dek dikayuah, mudiak tak rago dek digalah, lah basicapek nak dahulu, basikuek nak mangabiah. Nan diri Maharadjo Diradjo, hutang mairik mamuloi, disentak padang nan panjang, dirambah samak jo baluka, urang nan banyak manuruti, paguno pakakeh tajam, lah basicapek kuek sajo, didorong dek kandak bana, sasuai jo kandak hati, nan bak gurindam kato bida :
Lauik ditimbo mungkin kariang
Gunuang diruntuah amuah data
Dek samuik lai runtuah tabiang
Apo lai dek manusia nan baraka.
Dek baiak paham sasuai, dek elok bana sauku, mambayang tuah di sakato, tacapai niat jo tujuan, lah alah samak jo baluka, rimbo dalam nan lah tarang, lah laweh tampat kadiaman. Mulai dibuek rumah tanggo, disusun korong jo kampuang, timbualah mupakat jo sakato, dibuek tapian tampat mandi, dibantangkan jalan labuah golong.
Dek lah buliah nan diagak, lah dipek nan cinto hati, niat sampai, kaua salamat, lah samo bahati riang, suko lah lahia kabuatan. Lah bakorong jo bakampuang, diadokan tampat bahimpun, bakeh ba-suko2 hati, kajadi tampat pamedanan, himpunan paubek jariah, nak riang hati nan basamo, jariah jo payah lah bajaso. Sampai sakarang iko kini, banamo kampuang Pariangan, duo jo Padang Panjang, dek malambeh jo padang panjang, lah jadi kampuang jo nagari, rianglah hati kasamonyo, baitu kato dalam tambo.
Adopun nan kampuang Pariangan, duo jo koto Padang Panjang, dibawah linggundi nan baselo, jo sawah gadang satampang baniah, kurang bana tanah nan data. Dek lamo bakalamoan, putaran alam tak baranti, tahun baganti zaman baeda, urang kian lamo makin rami, rakyat batambah kambang juo.
Lah sasak nagari Pariangan, duo jo koto Padang Panjang, dipindahkan urang limo kaum, dibuek koto duo baleh, katanah data nan lai laweh, sabalah bawah Pariangan jo Padang Panjang, sabalah mandun jo selatan, dikaki gunuang Marapi.
Disitu ditaruko pulo sawah ladang, dibuek tabek jo tapian, dibuek jalan labuah golong, tadirilah korong jo kampuang, mulolah dari taratak sampai bakoto banagari.
Tatkalo samaso itu, lah patuik ado nan kuaso, untuak karuah mampajaniah, hukum mahukum dalam kampuang, dibawah Maharadjo Diradjo, sabagai ayam nan bainduak, sipatan siriah nan bagagang. Didirikanlah balai balerong panjang nan tujuah baleh ruang, usaho niniak muyang kito, Datuak Tantedjo Garhano; itulah nan diatok sambia duduk, nan diturang sambia tagak, di Tabek dakek sawah tangah.
Dibalai panjang itulah mulo badiri undang2 pahukum mano nan salah, pamarentahi koto jo nagari, sampai kadusun korong kampuang, lalu kataratak padangauan.
Tatkalo samaso itu, tigo undang2 nan badiri, tigo adat nan bapakai, didalam koto jo nagari, sampai kadusun nan baumpuak, lalu kakoto nan bajerong.
- Partamo Simumbang Jatuah.
Nan tidak tasangkuik tasampang, tidak tasingguang tadaguah, nan bak umpamo aia hilia, bak hujan jatuah kakasiak. Kok tumbuah silang jo salisiah, sangketo dandam jo kasumat, didalam koto jo nagari, lah sampai hukum bahukum, diateh balai balairong, hukum tak buliah dibandiang, kato tak buliah dimusiah, rundiang tak buliah disalokai, bana tak buliah disabuik. Hukum jatuah wajib dituruik, takadia pantang disanggah, walau zalim wajib disambah. Hukum putuih parentah jatuah, hukum pancuang paralu putuih, hukum bunuah matilah badan, hukum buang jauahlah diri, hukum gantuang tinggilah bangkai, tak buliah dibandiang lai.
Hukum putuih badan bapancuang, bapanggang kadalam api, dengan sakiro kalahiran, lah banyak mati basabab Hukum bak rupo mumbang jatuah, bak hujan jatuah kakasiak, baitu undang2nyo, baitu tata barihnyo, nan takarang ditarambo.
- Kaduo Si Gamak Gamak.
Kok ado karajo nan dikakok, ataupun barang nan dibuek. basicapek nak dahulu, basikuek nak mangabiah. Mano nan tampak lah diambiak, mano nan ado dikarajokan, tidak dikana awa akhia, raso pariso tak ditaruah, asa dapeklah manjadi. Sa-baiak2 pakarjaan, sa-elok2 aka budi, hinggo mukaruah maso kini, baitu tasuo ditarambo.
- Katigo Si Lamo Lamo
Babanak kapangka langan, batareh kaampu kaki, basasi kaujuang tapak. Nan kareh makanan takiak, kok lunak makanan sudu, nan pantai batitih, nan lamah makanan rajiah. Kok ado batang nan malintang, dikarek di-kabuang2, diputuih dikuduang tigo.
Kok lai dahan nan mahambek, dikupak dipatah duo, kok tampak rantiang kamangaik, disakah dipalituakkan, atau runciang nan kamancucuak, ditukua dipumpun ujuang. Nan tinggi timpo manimpo, kok nan gadang lendan maendan, kok panjang kabek mangabek, nan laweh saok manyaok.
Dek tahun musin baganti. dek zaman tuka batuka, dek lamo maso nan talampau, tahun jo musim nan talansuang, tasuo kato bida adat :
Sakali aia gadang
Sakali tapian baraliah
Aka kin lamo makin panjang
Karuah kin lamo makin janiah.
Antah barapo kalamonyo, undang2 nan tigo balakunyo, tidak tatulih dalam tambo. Hanyo dimaso nan kudian, samaso "Suri Diradjo", tidak tapakai nan baitu, nan bak bida adat djuo :
Sakali gadang balega
Sakali adat barubah.
Tatkalo samaso itu, nan diri Suri Diradjo, maniliak hukuman nan balansuang, undang2 nan balaku, lah nyato tidak dalam bana. Dikana akibatnyo nan lah lansuang, banyak urang nan tak salah, nan lah kanai dek hukuman, tidak nan salah nan batimbang, bukan bautang nan mambayia. Tidak nan lain karanonyo, dek bana tak buliah disabuik, kato tak dapek dimusiah, hukum tak buliah dibandiang, sasek dek tidak buliah suruik, salah tak dapek mintak ampun.
Maniliak caro nan bak kian, timbualah insaf dalam hati, rahim dihati lah mandatang, dicari caro nan kabaiak, rakyat nan banyak nak santoso, adia hukuman nak tapakai.
Sajak gadang lah balega, kapado Suri Diradjo, adat barubah hanyo lai, undang2 lamo nan lah lipua, caro aturan lah batuka. Kato lah dapek dimusiah, rundiang lah buliah disalokai, hukum lah buliah dibandiang, bana lah dapek disabuik.
Kok sasek lah buliah suruik, talangkah buliah kumbali, bareklah dapek mintak ringan, salah ado dapek ampun, maniliak tampat tumbuahnyo. Budilah mulo dianjuang, raso pariso lah bapakai, sopan jo santun lah ditaruah, lah mulo aman korong kampuang, santoso anak kamanakan.
Kok mati lah dikanduang tanah. Hiduik lah dikanduang baпа Lah tatap hak jo manah. Hiduik lah kana mangana.
Bahagian 2.
B. Undang -Undang Tariak Baleh
... Bersambung
Foto sebagai ilustrasi : Minangkabausch huis. Sumatra." Creator drukker: N.V. de Tulp, Haarlem uitgever/archief: ANWB Toeristenbond voor Nederland
Ditulis ulang : Marjafri , pendiri dan ketua komunitas anak nagari
Silakan baca konten menarik lainnya dari BentengSumbar.com di Google News
BERITA SEBELUMNYA
« Prev Post
« Prev Post
BERITA BERIKUTNYA
Next Post »
Next Post »
