Di Minangkabau, negeri yang kental dengan tradisi adat, kegiatan Manjanguak ini tidak hanya sekedar mendatangi rumah yang ditimpa kemalangan dengan membawa buah tangan baik berupa beras dll.
TRADISI Manjanguak atau menjenguk saat ada masyarakat atau karib kerabat yang meninggal dunia adalah sebagai bentuk perhatian dan kepedulian sosial antar sesama yang sudah diwariskan sejak jaman dahulunya.
Di Minangkabau, negeri yang kental dengan tradisi adat, kegiatan Manjanguak ini tidak hanya sekedar mendatangi rumah yang ditimpa kemalangan dengan membawa buah tangan baik berupa beras dll, tapi ada tatacara yang dilakukan salah satunya saat timbang terima kain untuk pengkapani si Mayat.
Berikut tatacara serah terima kain kafan yang penulis kutip dari artikel di majalah adat Minangkabau edisi 1 - 3 tahun 1939.
*************************
* A. Angku !
Sambah dipuhunkan kapado Angku !
Sungguahpun angku sorang jo baduo nan disambah, nan sarapéknyolah sagalo nan diatéh rumah nan ko, nan ditanai lantai, nan disungkuik atok, tampék ambo mangarang mahantakan sambah jo salam, artino dak katabilang katahatok, pambilang pahatok sambah jo simpuah pamuliakan dek ambo, Sambah nan dihadapan angku nan basamo.
Kasimpanan sambah diminta maaf dangan Ridho kapado angku Dt. B. Sakoto. Artinyo sambah nan kan dilalukan, tidak nan kan dipuhunkan pado angku, iyo juo bak sarupo firman Tuhan dalam Qur'an :
"Kullu nafsin Zaikatul maut, tiap-tiap nan bernyawa merasai mati, tiap-tiap nan bapucuk manaruah layua".
Dang kato sakik baliau ko, alah sahari duo hari lah sapakan duo pakan, dicari dukun nan pandai jo tawa, ureh tidak menyanangkan, tawa tidak mandinginkan:
"Si Tawa nak urang Padang Panjang,
dibao nak urang Payokumbuah.
Ubek dimintak biso datang.
alamaik panyakik kan mambuпuah".
"Dipancuang talang kan turak
diambiak kan junjuang baniah.
labiahnyo kan tangkai sando
malang nan tidak buliah ditulak
mujua nan tidak biliah diraiah
buruak juo nan basuo".
Lah panjang palupah.
lah singkek pirak-pirak,
lah panjang langkah.
lah singkek nan tamintak
dek baliau ko artino lah pulang baliau karahmatu'llah. Bak dang kato lah pulang baliau nangko dari nagari nan fanah ka nagari nan bakha, mako teringek tapikialah dek nan bakarik babaik, nan bakuduang bakaratan, nan baranak babapak, nak mandirikan nan sapandjang adat.
Apolah jinihnyo nan sapandjang adat:
...Mati bapak bakalang anak,
mati anak bakalang bapak."
Supayo biang nak tabuak, ganting nak putuih, di hari nan sahari iko, dang kato lah mati bapak iyolah handak mengalang anak. Kok pitih nan dibao minta disadakahkan, kok kain nan dibao minta dikapankan..
Mintak ditarimo dek Angkoe jo hati nan suci muko nan janiah.
Sakian sambah dipuhunkan.
** B. Jawab Datuak B. Sakoto:
Angku Datuak Pamuncak Alam !
Panitahan Angku cako dianjuang tinggi diambah gadang. Baa karano biaso kato bajawab, gayuang ba sambuik, diatéh angin nan ba-asa, hujan nan ba-mulo, kato nan bapangka.
Aaa... nan jadi pangka kato dk Angku tadi, dang kato lah panjang palapah, lah singkék piro-piro, lah panjang langkah, lah singké nan taminto dek baliau iko artinyo lah bapulang ke-rahmatullah. Mangko taingék tapikialah dek nan bakarik babaik, na' mandirikan nan sapanjang adat.
Apolah jinihnyo nan sapanjang adat.
Mati bapak bakalang anak,
mati anak bakalang bapak.
Baä dang kato lah mati bapak iyolah nak mangalang anak, kok pitih nan dibao mintak disadakahkan, kok kain mintak dikapankan. mintak ditarimo dek Angku jo hati nan suci muko nan janiah, kan baitu bana bunyi panitahan Angku tadi !!
Maä... Angku Datuak Pamoentjak Alam ! Bunyi panitahan Angkoe itu, ditilik takarim sambah, ditimbang mualim kato, kok sambah alah lah tibo pado tampeknyo, kok kato alah manuruik alua jo patuik, tapi sungguhpun baitu karano sapakaik menjadi adat, saukua menjadi cupak', baa to kini karano niniak mamak duduak balingka jo adat jo pusako, dirantang kato jo mupakat, dicari kato jo baiyo mananti Angku sakutiko, laikoh didalam adat ??
* Jawab Datuak Pamoentjak Alam
Maa... Angkoe !!
Sapandjang buni panitahan Angki Datuak Sakoto itu alah didalam adat jo pusako, didalam barih cupa jo gantang, kok mamahék lah dalam barih, bakato dalam pusako, alah juo bak kato pituah urang tuo
Rumah gadang tampek bamalam,
kayu gadang tampek balinduang,
nan cadiak tampek batanyo,
samo gadang lawan baiyo".
rancak bana Angku paiyokan sipat menanti kami.
Datuak Sakoto memperlegakan sambah kepada halat yang datang kata beliau:
Maä... Engkoe.
Datuak Bandaharo Saring !!
Sambah dipuhunkan pado Angku, sungguhpun Ka-Angku sorang jo baduo nan disambah, serapéknyolah sagalo baliau nan hadir, tampek ambo mendatangkan sambah !
Sambah tibo dihadapan Angku Datuak !! Artinyo sambah nan kan dilalukan, titah nan kan dipuhunkan kapado Angku, sapanjang panitahan Angkoe Datuak Pamoentjak Alam tadi, kok bunyilah samo kadangaran, kok himbau lah samo kalampawan, baä karano kato biaso bajawab, gajuang biaso basambuik, pihak nan kan manjawab itulah dipulangkan kapado Angku.
*** Jawab Datuak Bandaharo Saring kepada Datoe' B. Sakoto
Sapandjang bunyi panitahan Angku tadi alah di dalam adat jo pusako, digalanggang sidik iyo bana, diadat bakato baiyo - iyo, bajalan bamolah, baa dipuntiang nan manikam, rasuak nan mahantak, karano di Angku tatapèk' sambah, kini bapambarilah Angku. Baa pambari Angku itu, lah sapakat kami nan basamo, kok tatangguak Angku di batu samo-samo kito mangiraikan, kok tatangguak Angku di udang samo-samo kito mamangèk', kan baitu nan sapanjang adat nan kito tarimo dari Datuak Perpatih nan Sabatang dan Datuak Katemenggoengan.
** Jawab Datoe' B. Sakoto kepada Datuak Bandaharo Saring
Maä... Engkoe Datuak Bandaharo Saring !! Sakéték nan manakuik nan manggamang dek ambo, karano dek Allah bersifat kadim, manusia basipat gawa, kok gawa agak sakėtėk dėk menyampaikan kato basamo, alah kan samo-samo kito memikua ? kok laï baitu, alah gadang bana hati ambo, alah warih nan kito jawèk, alah piagam nan dipakai, sakian nan dimintak pado Datuak.
*** Jawab Datuak Bandaharo Saring kapada Datuak B. Sakoto:
Maa... Angkoe Datuak B. Sakoto !,
Dikato nan bajawab, digayuang nan basambuik nan kan sambuiknyo dek ambo kato Angkoe Datuak itu ;
Adopun kito ko panghulu sahandiko, Rajo sadaulat, urang tuo sa undang-undang, salatak satarik, sahino samalu: baa to kini jan Datuak takuik ganta menyampaikan kato mufakat iko kepado pokok diatèh rumah iko.
Datuak B. Sakoto memulangkan sembah kepada sipokok (Datuak Pamoentjak alam) :
Maa... Angkoe Datuak !
Lah talalai pulo ambo manjawab panitahan Angku cako, karano sadang mampaiyo patidokan jo baliau nan basamó, bulek aia dek pambuluah, bulek kato dek mufakat, dibaliau nan basamo, iyo dari ambo juo tabiknyo, kato nan kan manjawab, gayuang nan kan manyambuik panitahan angku tadi.
Nan ka jadi jawabnyo di ambo, karano lah rapek jo ganok ninik mamak sarato guru alim ulama, dang kato jauah lah baturuik, hampia lah bajalang, kok hutang lah kan bahantakan kapintu taraju, inai lah bahantakan pulo kapintu kubua, diulak jo angku ko sahinggo itu sajo baa nyo Angku ?
* Angku Datuak Pamoentjak Alam:
Sapanjang buni panitahan angku itu, jalan nan pasa pulo nan batampuah, kato nan bana pulo nan basabuik. Tapi sungguahpun baitu, karano lah tumbuah dinan sarupo iko, kini kok sahandaknyo, kabukik samo mandaki, kalurah samo manurun, salangkah saganoknyo, saasam sagaramnyo, tapi karano ketiadaan dikato nan sado itu iyolah sakadar mamparagokan hati nan suci muko nan janiah sajo. Kok pitih atau kain nan dibao iyo nak mintak Angku tarimo juo jo Angku, jo hati nan suci muko nan janiah..
** Datuak B. Sakoto:
Indak laï, kalau lah baitu bana dek angku nak mandaki bukik nan tinggi, nak manurun lurah nan dalam, batarimonyo tu Angku sipat menarangkanlah Angku.
- Si a Selampih membawa kapan (anak)
- Si b Selampih membawa kapan (anak)
- Si C Selampih membawa kapan (anak)
* foto ilustrasi : Tropenmuseum - Minangkabau huis Fort de Kock
* Ditulis ulang : marjafri, pendiri dan ketua komunitas anak nagari
« Prev Post
Next Post »
