"Manjalo di Aia Karuah"

Ilustrasi. 

SUREK TABUKAK UNTUAK PAK MAHYELDI, WALIKOTA KITO JUO. Surek ko ambo agiaj judul e: "MANJALO DI AIA KARUAH".

Pak Walikota, surek ko ambo buek jo caro bacarito-carito sajo. Supayo enjoy kelihatannya. Ini sesuai dengan perjalanan ambo di salo ganangan aia pado hari Selasa sore tadi ko bana ha.

Baiko lah Pak Wali....

Padang sadang baraia kini. Sabagian ruas jalan panuah di aia. Aia banda jo batang aia malimpah. Perumahan nan barado di kawasan nan jalan aianyo indak jaleh, nyo kuruang dek aia. Aia indak singgah sampai halaman se doh. Lah bakato aia se masuak. Kadang aia tu ba puyu bagai, ba ikan pareh, ba limbek, basarok, baluluak.

Denai sore tadi bajalan-jalan sapanjang jalan baraia. Mulo-mulo, aia baganang di muko G Sport jalan Gajah Mada. Lewat Simpang Tenju, lai aman. Taruih Simpang Presiden, aia maleleh lo di sabagian rueh jalan Khatib Sulaiman.

Taruih ka jalan Hamka, hinggo jalan Adinegoro. Nan partamo denai caliak, oto banyak baranti sapanjang tapi jalan. Indak tahetong-hetong jo tangan lai. Rupo e oto takuruang. Indak bisa lewat dek karano karikia nan manupang rel kereta api tu sabagian karikia e ambrol. Aia kiri kiriman dari tangah jalan, mangikiah karikia batu di badan rel. Akibaiknyo, tagantuang-gantuang rel basi di ateh tanah. Mungkin sahari tadi, kereta api Padang-Piaman istirahat manombang. Kok nyo pasoan juo dek mak itam mahinjak rel takah itu, namuah bengkok-bengkok rel di buek e mah. Kalau sakadar bengkok mungkin indak ba-a, kok katagarubuak kereta tu ba-a? Sia nan kamahangkek. Ko kareta api mah sanak, sabana barek...

Sasudah tu, tanyato, kawasan Kototangah iyo kawasan nan paliang sansai dek ulah banjir.

Ambo amati, soal banjir di Padang, indak sabarek-barek mangatasi soal banjir di Jakarta gai doh. Tingga mampelok-pelok i tali aia se nyo. Atau tingga manormalisasi babarapo batang aia nan mamabalah kota Padang.

Wakatu lewat di jalan iko, basuo ambo jo urang nan sadang malompek an jalo di tangah jalan nan baganang aia.

"Manga tu Da !" rabik ambo sambia mamacik kamera.

"Manangguak Diak"
eh, padohal nan ambo caliak nan dilompek annyo bukan tangguak, tapi jalo.

"Manangguak di aia karuah mah Da! Lai adoh dapek Da!"

"Lai, lah saguntia", jaweknyo sambia mancaliak an puyu,limbek, ikan pareh, ikan rayo....

"Inyo lain lo mah Diak, kalau banjir lah tibo, adoh-adoh serasaki tangguk ko " keceknyo lo.

Eh, wak lupoan soal tangguak manangguak.

Ambo Rang Simpang Alai Padang. Di lakang rumah gadang ambo adoh banda. tampek ambo balumbo-lumbo jo basihanyuik jo kawan samo gadang. Dahulu batahun-tahun nan lampau, kalau hujan labek, aia satinggi lutuik. Nyo caca Simpang Alai sampai ka arah SD Alai.
Tapi sajak walikota Zuiyen Rais,banda Alai nyo pelok i. Lah rancak banda tu kini. Lancar sampai ka banda bakali.

Sudah tu, pado maso Walikota Sjahrul Ujud, nan alah dimulai dari Walikota Hasan Basri Durin, nan banda bakali tu dipelok i pulo. Babeton suok kida. Proyeknyo terkenal dengan nama Proyek Pengendalian Banjir. Nan bakarajo pamborong dari Korea.

Sabalun Banda Bakali dipelok an, yo bana marasai rakyat Kota Padang kanai banjir. Tapi kini indak lai. Aia alah jinak sampai ka muaro.

Kini Padang makin berkembang. pambangunan parumahan makin banyak. Kadang mambangun rumah di jalan aia bagai. Indak tahu awak, lai baamdal parumahan nan dibuek tu atau indak. Nan jaleh makin banyak rumah tagak, makin tadanga dek awak lokasi-lokasi baru nan kanai banjir.

Soal-soal model iko, tantu manjadi tugeh bagi Walikota. Pak Mahyeldi harus labiah bakarajo kareh untuak mambebaskan warga Padang dari banjir.

Ondeh Mak oi. Perumahan Siteba, dek acok kanai banjir, lah sipakaik se urang mambari akronim pado kato "Siteba" itu tadi, yakni "SIap TErima BAnjir".

Kalau Pak Mahyeldi sanggup mambebaskan Siteba dari banjir, alangkah basyukurnyo warga Siteba.

Cari-cariaan lah aka Pak Wali. Ba-a caronyo dunsanak awak nan tingga di Siteba jo daerah lain di kota ko, indak kanai banjir lai. Cubo Pak Wali bayangkan.....nan ateh namo aia, masuak e capek Pak. Nan bedo, awak sadang takalok di malam hari, sadang lamak bamimpi-mimpi, eee tibo-tibo banjir datang. Lah nyo randam sagalo peralatan elektronik. Bara banyak karugian masyarakat atas kerusakan peralatan itu. Kalau misalnyo harago tipi duo juta ciek tipi, kalau di kali sajuta tipi, bara pitih e tu heh?

Nan babahayo bana, kok kanai sangek listrik, bisa maningga wak dibueknyo.Sakali maningga, kan iyo wak dapek sajuta. Kok bisa wak maningga saribu kali, kalau di kali sajuta, lah padek lo isi saku rang maningga mah. Itu sasuai jo janji Pak Mahyeldi wakatu kampanye dulu mah...sia maningga...ko pitih sajuta. Tapi mauruih e payah lo.Bunyi kaba sampai kini alun juo kalua-kalua pitih maningga tu lai. Padohal apak bajanji arek dahulu, sia maningga sia dapek sajuta.

Kini baitu se lah Pak Wali nan ambo kenal. Membenar kita ini ha, tolonglah bebaskan warga Padang dari banjir-banjir ini, sudah menderita warga dibuatnya. Kadang lontong nan dibuek malam, lah tarandam dek aia.Lah lenyai se we e.

Pak Walikota...ayo lebih bersemangat Pak...Ayo kita bebaskan kota tercinta ini dari banjir.

Coba Pak Wali lihat, betapa ancaknya poto nan dapek ambo abadikan. Rakyat Pak Wali manangguak atau manjalo di ateh jalan nan taganang dek aia karuah.

Kok manjalo, tantu tampeknyo di tampek nan tapek. Di sungai atau di tabek; tu baru pas. Kalau banjir ko indak taatasi dek awak Pak, tantu tiok hujan labek, jalan taganang lo liak.

Kalau baitu, saran ambo ciek se lai, mari kita bantu warga kota Padang yang wilayahnya sering terkena banjir itu. Kita bantu dengan ciek rumah ciek tangguak atau ciek jalo; bia dapek lauk nan banyak. Indak paralu lai mambali lauak ka pasa. Indak na tibo bantuan, nan jaleh dalam banjir awak makan lauk juo...

Yo sagitunyo Pak Wali...

Ditulis Oleh:

Pinto Janir

Seniman dan Budayawan Minangkabau.

Silakan baca konten menarik lainnya dari BentengSumbar.com di Google News